要數今季合拍騎練，田泰安與姚本輝必定榜上有名，兩人今季僅合作11次，卻交出五冠一亞，入Q率逾五成，而且兩人今季在快活谷賽事，僅合作過一匹「勁新鮮」，更立即贏馬而回。今期姚本輝將一對王牌馬「鼓浪飛星」及「火麒麟」一併交由田泰安操刀，騎練可望繼上周三之「平民百勝」後再合作贏馬。
第四場五班1800米之「鼓浪飛星」今季三戰，所輸距離一仗比一仗接近，可見本身不斷進步中，其中上仗初戴眼罩，首次角逐谷草1800米即跑第三，乃出道以來最佳名次，已搵到最佳出路，今次吼準同程打王牌報名上陣，換上馬房愛將田泰安，睇部署必求贏馬補中。
至於第七場三班1200米之「火麒麟」，雖然在港五戰全負，不過上仗排12檔角逐谷草1200米只輸四身位，表現其實絕對唔差，復課由田泰安接手，經常親自快跳，對此駒重視有加，憑輕磅之利，有力一撼對手。