勇士NBA開季未逢敵手，已經連贏15場，連上季總決賽輸畀佢哋嘅騎士大將勒邦占士（LeBron James）都唔抵得，葡萄咁話勇士咁勁都係因為好健康冇傷兵。其實騎士開季都唔錯，周一主場117:103大勝魔術，主場八戰全勝，「大帝」更平咗名宿奧斯卡羅拔臣（Oscar Robertson）嘅得分兼助攻紀錄。
平得分加助攻紀錄
騎士後衞K艾榮（Kyrie Irving）開季仲未復出，最快可能要12月中先可以上陣，加上中鋒莫茲哥夫（Timofey Mozgov）、後衞莫威廉士（Mo Williams）等傷兵，不過周一主場出擊對魔術都夠殺，全能前鋒路夫（Kevin Love）攻入34分，三分波仲九射六中，幫球隊大勝14分，主場八戰全勝，開季11勝3負，僅次於勇士咋。講開主場長勝，馬刺同日以98:84擊敗太陽，同勇士、騎士都係聯盟至今三支主場長勝之師之一。
大帝今仗得分少咗啲，只入15分，不過就有13個助攻，其實佢咁專注助攻都有目的，因為助攻數字突破6,395個，已經躍升為NBA歷來前25位，得分方面就排第19位，係NBA歷來除咗奧斯卡羅拔臣外，另一位球員可以得分同助攻都打入前25嘅球員。對於上季總決賽對手勇士開季咁勁，大帝就話：「我覺得健康對佢哋有好大作用，佢哋一直保持健康，係我歷來見過嘅最健康球隊。」言下之意就話勇士有傷兵就唔會咁勁啦，今年聖誕節當日，騎士就會作客勇士，睇吓騎士如果「夫添」出擊，又夠唔夠勇士打？