香港發展商近年興推豆腐膶咁細嘅蚊型單位，可以keep住單位呎價過萬元，而單位售價總額唔大，容易吸引上車客與投資者。而設計呢一類「蚊型」示範單位時，發展商通常傾向開放清水房，令到個單位喺視覺上感覺寬敞啲。
新地（016）副董事總經理雷霆噚日就夠晒大方，開放西營盤眀徳山一個實用面積331方呎嘅示範單位，仲畀一班傳媒一齊逼入呢個袖珍空間，齊齊感受一下呢個蚊型一房單位有幾咁舒適。
現場十幾人一齊逼喺個客廳度，都仲有位置畀雷霆跟新地代理助理總經理陳漢麟拎住個牌影相。照咁計，唔擺放傢俬嘅話，廿人一齊喺度開party，企得逼啲都唔係冇可能㗎喎，認真寬敞嘞。