永泰集團鄭氏一家五傑,香港人對於做過聯交所主席嘅大哥鄭維健,同埋做緊馬會董事嘅鄭維志比較有印象,佢哋有位喺新加坡坐鎮嘅細佬鄭維榮原來都會不時來港宣傳旗下樓盤。
鄭維榮噚日專登搭早機,由新加坡飛來港主持樓盤記招,佢排行第五,跟四位哥哥(鄭維健、鄭維志、鄭維強、鄭維新)一樣,都係低調得嚟,相當友善,佢介紹樓盤之餘,都呻咗句話前晚瞓得5個鐘,趕完早機,今晚又要飛返去新加坡。
鄭維榮畢業於美國西北大學,再到卡納基梅隆大學讀建築學,喺新加坡做過旅遊局主席同國家藝術局理事會主席,同鄭維強(永泰集團主席)一樣,係新加坡公職王。至於最受香港地產界人士熟識,應該係鄭維新,佢2004至2007年做過市建局主席。