收市閒情:Tree Gun「教」炒股 - 千頌C

收市閒情:Tree Gun「教」炒股 - 千頌C

區選完咗,最大快人心嘅當然係Tree Gun、葛博士爆大冷落選。你呢頭舉香檳大唱「熱烈地彈琴熱烈地唱」之時,呢兩位輸家冷不防行出來,講句落敗感言,聽完,你唔明;再去思考,都唔明;然後你就會後悔點解人生苦短,要為佢哋花一滴腦汁。兩位作為議員,仲話係博士,理論上都算係有啲社會地位嘅人,竟可講出咁唔logic嘅言論,想講嘅係,如果你用同一套邏輯去炒股就真係死。
鍾樹根:「我從政timing不好,早些出生,可能像曾鈺成上了位。」
落敗之後,鍾樹根竟然感慨時不與我,作為小市民,聽到真係會想叫一句癡根。佢做人何不正面啲?掉轉諗係:「我從政timing真好,否則我可能一年議員都做唔到。」
炒股最忌就係呻timing,「最衰我頭先淆底冇買啦,𠵱家升咗半成啦!」「哎呀,早知我唔咁大貪啦,𠵱家倒輸返轉頭。」呻完一輪戥自己唔值,然後就咩都唔做。「升咗先買好唔抵!」「輸咗咁多先沽,我唔甘心。」Hey!清醒吓,知唔知咩係機會成本?過咗去嘅嘢,唔應該影響你將會落嘅決定。覺得隻嘢得嘅,升半成都追!隻嘢話之佢之前識飛,如果家陣勢色唔對,就即掟止蝕連根拔,否則真係變「終輸根」,終於輸到癡根(爛)。
唔甘心,怨Timing呢啲無謂嘢,只會阻住你搵食,妨礙你審時度勢。唔信大家搵次見到Tree Gun時,同佢講覺得佢冇料,如果佢答你一句:「你做乜『悔』辱我?I don't think so囉」,咁你就明白呢個道理。
葛珮帆:「落敗因今次區選政治化。」
一個參與政治選舉,希望走入政制嘅人,怪選民「你哋太政治化囉」。當中嘅邏輯,應該唔係正常人理解得到。試吓如果你係經紀,幫個客落錯盤,你走去同佢講:「少少錢都計,你太『屎』儈囉。」睇吓你會唔會俾人鬧祖宗十八代。
「我討厭政治。」又係炒股大忌。唔好玩啦,就算聯儲局加息唔加息,都會有政治考慮吧?嗰陣港視(1137)升升跌跌,咪又係賭CY發唔發牌。特別係港股A股化越來越嚴重,更加易受內地政策影響。記唔記得「二孩政策」一推出,一眾概念股係咁升,估值?PE?咩嚟?食得㗎?咁「雞毛鴨蒜」嘅數字,仲邊有人睇?股票同選舉一樣,本身就係一場政治角力,喺香港完全唔理政治就落場炒,唔係唔得,輸蝕啲囉。
呢兩位人兄,可能好多人覺得佢哋成事不足。不過能夠喺佢哋呢兩句「賴地硬」嘅輸家感言,幫大家領悟到少少有用嘅道理,正如喺垃圾中搵到一支廢柴去生火一樣,真係功德無量。最後都要學個嫩模歌手戴返個頭盔先:本人意見不代表本人立場。

千頌C
http://fb.com/winbigwok
本欄隔周三刊出