區選殺出大量政治新星，好似「西環飛躍動力」三名成員都算高票落敗。其中喺發生過斬樹風波嘅大學選區，劉偉德奪1,455票，對比老手陳捷貴嘅1,844票，一啲都唔輸蝕。
有人似乎對當日支持路政署斬樹嘅陳捷貴繼續冧莊，有啲不滿喎，噚日「西環變幻時」fb就貼咗一張相，相中可見，位於西環般咸道被斬嘅四棵石牆樹盤根上，綁上「I DON'T BLOODY UNDERSTAND WHY YOU STILL VOTED STEPHEN CHAN」嘅標語（圖），明顯為古樹控訴當區選民唔踢走陳捷貴。
陳捷貴同八方講，今次對手得票之多係意料之外，會從選舉結果參考民意，相信斬樹事件係關鍵，但重申從未要求斬樹，「呢次要learn嘅係公佈意見要清晰啲」。佢話選舉係民主公決，「有選民都話既然有結果，點解仲咁講（貼抗議標語）？」