小YY仍是酒店小YY之時，在倫敦豪華酒店搵到第一份工，之後受不住紐約的誘惑，主動申請紐約St. Regis一份Butler職位，又俾佢搵到噃，於是去咗紐約一年先至回流香港。做butler其實即係某一層樓嘅房務總管，譬如第20樓，全層房間住客有乜嘢事都可以搵butler，例如擦鞋，搵必理痛，搵旅遊節目，訂百老匯戲飛，訂米芝蓮餐廳等等，全部搵butler再由佢轉介往個別部門，係一種認真貼身嘅服務，人客當然覺得好好，十分開心，但對酒店來講，每層樓多一位「樓面經理」，花費大好多噃，故此其他豪華酒店都好少有呢個職位嘅。
St. Regis係高檔豪華酒店之中響噹噹嘅品牌，屬酒店集團Starwood Hotels & Resorts擁有，姊妹酒店有W、Westin、喜來登等，Starwood（有個中文名字叫做喜達屋）在全世界共有1300間酒店，因多年來股價不振，俾基金股東進逼，於是聘請投資銀行Lazard做顧問，研究改組，得出嘅結論就係「善價而沽」，全世界搵買家，於是一度傳出消息話中國投資，錦江飯店，海南航空之母公司及凱悅酒店等爭奪，小YY聽見就話：「哎吔，唔好啩，俾錦江買咗，St. Regis點似樣呀！」
原來殺出個程咬金，最後買家係Marriott（萬豪），萬豪全世界有4200間酒店，幾乎總有一間在你附近，連沙田石門工業區都有一間Courtyard Marriott，美國旅遊人士有一笑話係：從飛機跌落嚟，最有可能跌落一間萬豪酒店。兩者合併之後，全球有5500間酒店，巨大到無比，但兩者嘅企業文化、個人優秀服務標準完全唔同，合併後，兩者人客鍾唔鍾意呀？
小YY就好擔心St. Regis會退步。紐約時報訪問一啲喜達屋優先顧客（即每年住百幾晚嗰類人），個個表示擔心，唔鍾意喜達屋與萬豪合併，個個都驚住喜達屋服務水平下降，再冇貼身私人服務。現代經營模式就有呢個難處，要人客滿意，人客忠心，就要提供最佳服務，但高質素服務係要用錢搭夠嘅，例如每層樓請一個butler，導致經營成本高過其他業者。萬豪嘅模式就似超級市場，夠多夠大夠齊全，服務質素係大路貨；但超市唔係專門店，服務對象與質素有大分別，兩者合併是否行得通，取得協同效應，誰也不敢擔保，萬豪與喜達屋合併後大約十年就可能有答案。