已故「慈善伶王」新馬師曾遺孀洪金梅（祥嫂）跟子女再爆衝突，一家人又因財反目斷絕來往！昨日祥嫂和黃夏蕙到元朗鄧氏宗親祭典，祥嫂當眾數臭子女，她感嘆說：「20年前同祥哥嚟過，20年後自己孤家寡人嚟，感覺好欷歔！」問跟子女是否切肉不離皮？祥嫂有骨地說：「在我嚟講就係，至於佢哋，我唔可以代答。」
是否跟子女又爭家產？祥嫂說：「講真做戲佬賺得幾多，祥哥又爛賭，搵得嚟輸得去，總之只係地同物業增值，啲地喺67年已經買入，總之我有嘅物業，冇賣過出去，比上不足比下有餘。自己係一個賢內助，之前祥哥三任老婆都冇呢啲物業。」
「話我勾佬好勞氣」
問到現在是否分了家產？祥嫂勞氣地說：「我都未死，分乜吖！如果分咗我又未死，我都要生活㗎，如果佢哋謀我點算呀！」仔女有否要求分身家？她說：「佢哋喺門口大閘等我好耐，我都唔見佢哋，有三個仔女，除咗鄧兆榮，佢哋嚟等我，仲帶埋授權文件要我簽，仲特登抽要交稅文件畀我簽，當時我個心好驚嘞，唔知佢哋係咪想起我尾注，因為佢哋害過我，咁我要防。」
有多久沒見過仔女？祥嫂晦氣說：「我生過咩，我唔覺喎，我都忍辱負重十八年，唔想祥哥個名整衰咗，我唔係怕邊個，亦唔係怕我所出嘅，我𠵱家公開挑戰佢哋，佢哋夠膽就出嚟同我當面對質，點解佢哋要虐老！」對於女兒鄧小艾指服侍得祥嫂好好，祥嫂不屑說：「佢服侍我乜嘢？我行得走得，有事就鍾無艷，冇事就話我勾佬，令我好勞氣！」
採訪、攝影：譚倩宜