十優狀元港姐麥明詩，終於現身撐佢男友、即係大律師林作嘞，但都仲係，猶抱琵琶半遮面嗰隻喎！前晚區選投票後點票，八方都特別去咗林作以及人力譚香文參選嘅黃大仙龍星選區票站，睇吓大律師鬥會計師，邊個先至話到事？結果林作俾譚香文打敗，無法成為一擊即中新人王。
一直未有喺選舉期間現身為男友拉票嘅麥明詩，其間戴住口罩悄悄到達票站，不施脂粉但好多人都認出佢，即時有人問佢係咪「麥小姐」？點知佢最初竟然話「唔係呀」！但眼利記者點會信呢？不停叫兩人合照，但唔認係麥小姐嘅麥明詩唔肯，原因係「驚公司鬧」，最終喺合照時企到無雷公咁遠，唔畀大家有幅世紀sweet sweet合照。
支持繼續追求passion
雖然男友仔輸咗選舉，但麥明詩話會繼續支持對方，「繼續追求佢嘅passion」。林作則喺敗選後，即時通知為佢站台嘅才子陶傑今次落敗了。至於未來政途如何？林作話希望繼續從政，但要分析完選舉結果先決定下一步，而至今，真係冇諗過要選立法會喎。身在海外嘅陶傑則喺facebook留言鼓勵：「林作輸咗，不要緊，還年輕，海闊天空。」陶佢仲強調新人嚟講，林作輸300幾票算係咁。