「昭明公主」鍾銘麟改名中出羊子（圖），出戰區議會大角嘴櫻桃選區，最終以172票落敗。法例規定，候選人嘅得票如果少過該選區選票總數5%，就要沒收3,000蚊，而羊子得知票數後，噚日凌晨已經喺facebook貼文，話以該區總票數2,602票去計，佢嘅得票拎得番選舉按金。巴閉力保3,000蚊不失之餘，羊子仲寸爆咁同睇死佢拎唔夠票嘅人講，會將按金唱晒做一蚊銀，「你同我食X晒佢」。
選舉日一度嬲嬲豬話冇人撐佢嘅羊子，選戰後都有感謝助選義工，佢哋原來選舉後有一齊食嘢，仲貼晒相上facebook。佢班助選義工們又三點式又漢服咁，勁出位幫佢造勢，成為全城焦點，八方都覺得真係要多謝佢哋。