46歲嘅漢能（566）財務總監林一鳴月初先至完成非常intensive嘅三項鐵人賽，呢位財經界運動健將好似唔使點休息咁，前日早上以21小時37分完成毅行者比賽。
林一鳴今次第一次與玩開毅行嘅《立場新聞》創辦人蔡東豪組隊參賽，4人一隊嘅參加者需於48小時內，完成100公里麥理浩徑同接續路段，少啲體力和鬥志都難以捱到終點。
佢哋用咗不足22小時，就行完100公里，林一鳴就話滿意成績，「我哋呢個年紀唔係跑成績，能夠完成賽事都已經好滿意」。
佢話今年天氣熱，而且又冇風，一行4人去到第4段（水浪窩至大老山）已經減慢步速，好彩有朋友喺賽道上補給食物，讓佢哋可以坐低食麵同壽司，稍為回魂。其實人生就係咁樣，行吓、跑吓、休息吓，然後再抖擻精神繼續出發。