三個女人一個墟，加多個當然更加不得了。講緊嘅係張栢芝、鄧萃雯、張文慈同埋衛詩四位基督徒。佢哋4個好姊妹噚日下晝約埋一齊去銅鑼灣購物，栢芝、雯女同張文慈三個都係dry爆一族，感情未有着落，係得衛詩有個男友仔阿Tim。
不過，噚日衛詩撇低男友陪姊妹行街，完全冇話重色輕友。之但係，唔知衛詩呢排係咪開心得滯搞到心廣體胖呢，噚日着住黑色鬆身tee嘅佢，睇嚟發福好多，尤其佢叉腰嗰陣，成個肚腩凸晒出嚟，至於雯女同張文慈亦脹脹哋，係得栢芝身形keep得好。
周街自拍兼吹水
其實噚日下晝4點幾見佢哋嗰陣，栢芝已經挽住兩個膠袋啱啱買完嘢。四個女人邊行邊開心吹水，傾傾吓，仲周街玩自拍，真係好港女feel。雖然栢芝又戴帽又戴黑超，但依然有途人認得，仲搵佢影相，心情大靚嘅栢芝完全冇托手踭。之後四人行去珀麗酒店攞車，栢芝臨走仲逐個擁抱，真係姊妹情深。原來之前一日，雯女同張文慈兩位中女已經相約喺中環嘆下午茶，食飽後仲行街舒展筋骨，但行足一粒鐘都係冇收穫。
撰文：馮仁昭