一隻跌到殘嘅藥股同時間被兩位80後睇中。一位係藥股神童；另一位係投資新手，故事夠竟點收科？
是咁的，有位股齡得八個月、32歲嘅交易員Joe Campbell，想沽空藥股KaloBios賺番筆。呢隻藥股被睇淡，股價近兩個月喺低位橫行，終變仙股失守1美元關口。佢上星期三決定用28萬港紙沽空隻藥股，點知收市前爆出藥廠獲收購七成股權，刺激股價飆近八倍，令阿Joe一晚輸83萬。灰爆嘅阿Joe最後諗到網上籌錢，竟然又畀佢籌到四萬幾蚊。
阿Joe嘅悲慘經歷又帶出散戶點鬥唔過大鱷嘅現實。今次牽頭收購係華爾街「負評王」、又名藥股神童嘅Martin Shkreli。32年歲嘅Martin做對沖基金出身，11歲學炒股。四年前自立門戶做藥廠老闆，但被評為華爾街最差嘅藥廠老闆，佢只顧公司股價多過做好藥物研發，仲日日喺Twitter亂發炮。入主Turing藥廠後，將治療愛滋病嘅專利藥加價55倍，連希拉莉都鬧話要推政策阻止藥廠亂抬價，搞到生化藥股冇運行。
聲名狼藉都冇阻Martin搵食，交易文件披露佢喺KaliBios爆升前，佢喺61美仙至2.43美元價位分段吸納KaloBios，持股160萬，估計賬面贏過億港紙。
C+B
本欄逢周一刊出