【新盤衝擊】
元朗成新盤搶客戰場，迅即打殘本已死寂的同區二手。區內代理表示，就算元朗無新盤開賣，區內二手交投已十分淡靜，「只係新盤開埋仲死咁解」，成交量再減約一半。
新元朗中心、YOHO Town及YOHO Midtown三個主要屋苑，上月全月仍有9宗買賣，但本月首22天仍然「食白果」。
Midtown減百萬未獲承接
地產代理表示，雖然元朗部份二手業主已開始面對現實，「基本上打個電話都肯減價，但減得不多，減得十零廿萬邊有用，新樓又包按，又八成按揭，仲邊有人買。」他直言，「除非肯大大力劈，劈到好似美仔三條友260萬買嘉湖個價，咁就肯定大把人爭。」
區內一線屋苑YOHO Midtown已錄得最少5個減價盤，其中7座中層D室三房戶，實用面積901方呎，放盤逾一個月，原叫價1,200萬元，即使減價達「一球」，至1,100萬元，但叫價仍然「離地」，仍較銀行估值貴100萬元，所以仍然冇人吼。
屋苑1座低層戶實用面積453方呎，「兩個月前砌過呢個盤，我有個客畀價585萬，已比當時估價多少少，業主仲串串貢，減幾雞都唔肯，隊個老婆出嚟話唔制，好啦，到𠵱家業主肯減，減到560萬，個客又話個市會跌、加息嗰啲嘢，到個客唔『SO』佢。」業主當時見有客吊高賣，今日卻「蘇州過後冇艇搭」。
現時元朗最少10個主要屋苑，本月暫時錄得約7宗買賣，而上月全月則錄約17宗成交。有代理相信，區內樓價最少回落5至10%，才有望吸引買家入市。