講開金管局，有單關於金管局總裁陳德霖嘅八卦料。好多企業高層需要公開演講，通常搵公關幫手撰寫講稿，有啲公關直情專門負責寫講稿㖭，但原來陳德霖唔鍾意假手於人，好多講稿都由佢自己親自操刀㗎。
好似上星期六，佢出席中大商學院2015年度碩士學位課程畢業典禮，就親自以英文撰寫講稿，題目為「A Fascinating Train Journey」。
佢以坐火車比喻工作歷程，大家畢業後係攞到火車票，但車站有好多車，每架車入面又好多人，中途可能被人逼咗落車，想去到「成功站」都唔係咁易。當日子耐咗，大家就會發現，能升級到頭等車廂嘅乘客，並非只係孔武有力或聰穎過人，而係具備領導嘅特質（佢好似順便讚吓自己喎）。
不過老實講，陳總呢次演講好似講古仔咁，都幾得意，唔似佢平時喺立法會答議員問題咁死板。