黃昏，經鬧市行返舊校，巴士站前嘅機舖冇咗，變咗地產舖，那一年為咗慳一蚊打多鋪，寧願之後行遠啲搭巴士。當年機舖教曉我慳錢之道，今日嘅地產舖就提醒大家生活要更慳。
行大段斜路返到學校，點解學校細咗咁多？曾經眼中只有佢，所以好大啩！地方細好定壞？土地問題其實未必係壞事，你睇鄭智（左）港中大戰賽後嘅中肯分析就知道，球場細不利佢哋發揮，益咗我哋習慣逼埋一堆嘅地頭蟲！
地方細，其實問題係多嘅，容易產生磨擦，仲會好易妒忌人，《我的少女時代》 間中學有泳池、運動場，仲有荒廢後園可以養狗，《哪一天我們會飛》嘅校園後山亦可養鸚鵡，仲有大塊草地可以放飛機！我嘅中學年代呢，最多養過金絲貓，後尾好似錯手焗死埋。
地方細，但「少林寺」同學仔嘅眼光可以好遠，當年小息嘅娛樂就係手執一支維他奶，遠眺隔籬學校嘅女同學，今日我企番同一個位，樽奶嘅味道無變，但風景已經變成一道牆，因為隔籬友校已經執笠，「新法妹」亦成為歷史古字。
由於學校入面跑一個圈最盡得200米，以前練長跑奉旨出街跑，跑得出街就有啲同學（好似有我份）會乘機去老鼠窿士多兜個圈，呢間舖仔暗無天日，但有西瓜波賣，仲有電視睇，86年世界盃嘅早波，佢就係搞睇波party嘅始祖，不過今日個窿已經封咗。
學校活動完畢走人，原本路口有間Live Band餐廳幾啱敍舊，不過唔使等他日君體已相同，間舖已經拆卸重建，惟有一路落斜返歸，一路唱住那些年嘅歌，一路送自己一程。
KEYMAN
節目主持