成世人流流長，總會遇到不同選擇，每個決定，都會有不同影響。適逢來到區議會選舉，這是雨傘運動後的第一次大型選舉，有人將之視為梁振英主政後、香港最大型的民意測試。希望大家能夠運用自己的選擇權，這天站出來投票，為香港未來付出一分力。至少，你今天仲有得揀。
《選擇》
選擇，兩個字，細細個已聽過N次。由你懂事開始，佢就好似煩膠咁死纏住你，無論係幾芝麻綠豆嘅事，都迫你揀餐飽。食乜啦、着乜啦，煲乜劇、打乜game、出邊款手機、上邊個台……
由細到大，盡可能乜都自己揸弗，從來冇過問老竇老母，攤大手板嗰陣另計。冇記錯韓琛講過：「條路點行，就由你哋自己決定。」對與錯都冇得怨，你死你賤唔使煩。所以呢，由報邊間學校、讀邊科、玩咩運動、群啲咩人，到買邊隻馬同睇邊隻鹹碟，我都唔同人商量，亦唔理人點睇。
之但係，到你人大咗，你發現每做一項抉擇，身邊總有班唔關事嘅口痕友衣牙鬆鋼，打擊你士氣。
「阿偉，乜你咁重口味？有娜姐唔揀，有翠魚唔揀，偏偏揀雪雪做女友？」「你話晒HKU畢業，做乜咁兜踎學人做sales啫？」「好心你就上進啲，買番層樓嚟住，咪好似廢青咁淨係識瞓街，好冇？」
我心諗你班友都忽忽地。我同屋企人住，起碼唔使擔心飲鉛水。邊個話做sales冇發達，唔通學人炒倫敦金，玩層壓式先叫有前途？至於揀女友，我夠知Angelababy樣靚身材正啦，問題係人哋吼唔吼你先。至少雪雪我揀嘅，自己鍾意就得，你理得我。
至於啲人成日話「選擇恐懼症」，我心諗又係多餘嘅。即係咁，假設面前擺晒全香港報紙，斷估你唔會拎《大公報》上手嘛？又例如買飛睇戲，斷估你都唔會揀《港囧》，除非你係王晶。
我認為真正恐懼，係當有樣嘢，表面上有得揀，實際上冇得揀，或者粗俗啲講，有X得揀？
就好似你去旺角買電器，嗰啲豐X呀、百X匯呀、蘇X呀，賣嘅嘢同價錢幾乎一樣，叫我揀乜春啫！又好似去領展商場食嘢，唔係大X樂、大X活、就吉X家、老麥。我想食番小店人情味呀，都唔得？返屋企睇電視仲衰，遙控器撳到爛都係TBB九流膠劇，斷估冇人會當ATV係option啩？
有得揀，證明你仲生勾勾。冇得揀，你同喪屍冇分別。你有冇想過，就算呢刻有個銀仔，擲公擲字都唔輪到你話事，係有幾灰同無助？尤其今日香港已經變成「公就你贏，字就我輸」，有得選擇嘅嘢，其實所剩無幾。我認為，困難地選擇，點都好過輕易地服從，然後讓選擇流失。
我望住樓下啲區選街招，突然感覺有股熱血流動。
我明白，選擇權係要自己爭取同捍衞。
撰文：杜秋棠＠抽水站
https://www.fb.com/freakingwestlook