近日飯局之中，幾位財經界老友為樓市股市討論一番，從來都是樓市大好友嘅分析F今勻有啲轉口風噃，財務L話住九龍住得厭厭地，想搬番中半山，買或租不拘，橫掂佢住緊在圓方上蓋，嗰層豪宅租番出去，佢再租中半山應該冇蝕底，現金流一入一出，頂多打個和。佢以前買樓問分析F，分析F幾年來答案一樣，就係：「買就趁手，唔好猶疑。」但今個月嘅答案就係：「可以睇定啲先，講價壓價無妨，唔駛急。」
咁講法，咪即係睇淡睇跌？分析F話：「我睇唔到大跌，但認為樓價暫時到頂回落，主要原因係經濟增長放緩，大概只有2.4%，明年加薪幅度唔會高，零售業疲弱不堪，我驚住失業率會上升啫。仲有呢，美國在12月好似一定加息咁款，零息周期即將結束，未來一年雖然加息會加得好慢，但仍然會產生心理影響。」
樓價會唔會跌三成呀？大行好似瑞銀，個體大戶好似湯文亮，不斷唱淡，話樓市最多跌三成喎？分析F就話：「我一定唔信會跌三成，唔好自己嚇自己。」
至於股市，基金K就指中國經濟增長率一定向下調，內地A股無大升本錢，頂多係上落市，有甚麼深港通亦係吹水，對大市無幫助，若因深港通明年開通而買港交所（388），直情係傻傻地，銀行股唔好買，渣打銀行唔值得入貨供股，全部銀行股其實要避之則吉（恒生，中銀香港可能係例外）……唉講來講去，好似冇乜板塊可以買得入手，投資氣氛都幾沉悶。
前日，天真許打電話嚟叫左丁山去聽佢演講投資，時間係十二月一日星期二，在尖東Hotel Icon（即理工大學間酒店），時間係晚上七至九。可惜呢，左丁山另有約會，時間不合。問天真許到時會講啲乜，佢話係一個投資講座「2016年股市樓市展望」，要收入場費，每位200大元。要收錢，就要有啲把炮先至得，仲有乜人演講？還是天真許唱獨腳戲咁夠膽？天真許話：「有嘅，還有施永青、湯文亮與石鏡泉，大家會講豪宅、細價樓、工商舖工廈走勢，前瞻A股港股美股，邊個股市在2016年會跑贏大市等等。」咦湯文亮係樓市淡友，施永青係賣樓嘅，兩人是否會打對台？有興趣可以去聽吓。