立法會議員黃毓民（教主）舊年7月喺立法會答問大會，向特首梁振英掟玻璃杯，事隔一年被落案起訴普通襲擊罪。毓民早前講過歡迎特首喺法庭上同佢對質，但佢噚日去東區法院預審時喺庭外話，梁振英打算唔出庭作供，淨係畀書面供詞喎。佢面帶不滿咁話：「𠵱家唔係告襲擊曾鈺成，而係襲擊你梁振英，受害人都唔出庭嘅話審乜？」跟住又「勸諫」梁振英：「餐飯煮到埋嚟，睇吓加辣椒、加鹽定淡啲食嘅箒，都係要食㗎！」
毓民噚日無律師代表，話有啲律師覺得盤問特首有政治壓力，擔心佢會報仇，又話呢次審訊係不公，考慮申請終止聆訊。佢指特首地位「超然」於三權之上，「如果佢喺宣誓下作偽證咁點算呀」，質疑能否起訴特首。佢又話一個辯方證人都未搵到，有官員透過律政司覆佢唔嚟，有啲議員就「好驚青」，覆都唔覆。案件下月18日會做最後一次預審。