陳慧嫻明年3月將假紅館舉行「陳慧嫻Priscilla-ism演唱會」，她說：「今年三面台，舞台會玩百老匯、民族加後現代，仲會一定跳到儍，我唔係跳舞人，會好努力練，自己快歌唔多，會唱人哋嘅快歌。」
雖然唱片市場差，慧嫻慶幸可以密密巡唱，她說：「好好彩自己活躍喺八十年代有好多好歌，令到我可以去到今日，亦可以去到好遠地方，監製每月𢭃一份人工，但佢哋付出好多，歌手賺嘅錢比佢哋多好多，我成日話要分番啲畀監製，如果我真係有好多錢，我認為要畀番啲歐丁玉，我成日同歐丁玉講，張學友應該畀番好多錢你，佢幫學友做咗好多好hit嘅歌，我認為咁樣先係公道。我有畀㗎！佢結婚嗰時我畀咗好大封利是，哈哈哈！」