食完午飯在威靈頓街行過鏞記，俾人在後面叫住，回頭一望，原來係靚女律師S，真人版中環王迪詩，佢年紀細過王迪詩，已有倫敦紐約律師牌照，在美資大律師行工作。於是問佢最近做成點？升級未？靚女S話：「轉咗工嘞，去咗XYZ律師行，你聽過未呀？」聽過啦，凡係世界有名律師樓，左丁山都略知一二，呢間XYZ係M&A（併購）專家噃。靚女S話：「你果然Update。我最近就係忙於收購、合併、集資融資嘅工作，上星期六要OT，開工到星期日朝頭早三點！」年輕人果然搏命，亦有體力精神，於是讚佢幾句，但用番時下流行術語勸佢：「要注意work life balance。每星期工作時間太長，好容易做到殘，點嫁得出去！」靚女S即時大發嬌嗔：「你識得咁多人。介紹個筍盤俾我啦！」
又靚又叻，大把人追啦，駛乜介紹呀，只不過平時工作時間太長，相信佢顧得住高薪與花紅，長時間留在律師樓，就顧唔掂男仔約佢出街拍拖。老友記T律師就時常為此大吐苦水，佢個仔又係律師，港大高材生，一畢業就入咗英國大行工作，做IPO，已經做咗十年，搵銀能力強勁到極，年薪老早已經超過七位數字，之不過，冇拖拍呢！T律師做過無數次證婚人，見證過百幾次婚禮，但總未輪到自己在結婚證書上以家長身份簽名，梗係心急啦。小T也想拍拖，但在港大讀書時唔追番個女同學，一出到中環就做到不知時日過，屬朝七晚十之類，邊度會有女仔行埋嚟呀。左丁山經常鼓吹讀大學時拍拖追異性同學，就係咁解。律師T話小T已經唔恨搵錢，幾個月前轉咗工，去咗一間上市公司做in-house counsel，工作時間大大縮緊，有時間拍拖嘞，又係叫左丁山介紹「筍盤」女仔俾小T！
今日青年專業人士，不分男女，都受工作時間太長之苦，做ibank與IPO，M&A之律師尤其辛苦，美國華爾街今年有年青銀行家（30歲上下）跳樓自殺，不止一次，懷疑與工作壓力有關。摩根史丹利、高盛等已下令禁止職員在星期六日工作及周日工時太長開OT，除非事先獲得上司批准。賓架不開工，相關的律師亦可鬆一口氣，休息去也。一位朋友的兒子，在投行工作，位高權重，薪水花紅優厚，說已經搵夠，不想再苦拼硬拼，40歲一定退休，朋友問左丁山意見，左丁山說：「急流勇退，見好就收，明智之舉也！」