【本報訊】「我去邊都帶呢個喼，裏面全部係我參賽裝備，頭盔、戰衣、手套、鞋……」今屆澳門格蘭披治大賽車賽事進行得如火如荼，在華夏盃賽事中，最年長港人車手 60歲的譚耀基Allan，3年前開始迷上賽車，更密密參賽，韓國、中國、日本及泰國通通不放過，至今已累積50場鬥車經驗，不過澳門落場卻是第一次。
「好興奮，感覺到好大挑戰！」擁有加拿大土木工程師證書的Allan，是美國土木工程師學會總監，一直以來從事大型基建工程，現為新加坡新國際機場工程的項目總監，「我而家管理緊500名工程師，成個項目涉及款項逾100億；壓力好大，賽車可令我減壓」。
自言對房車情有獨鍾的Allan：「房車係平時喺街上可以見到嘅車款，會投入點，有親切感。」17歲那年，他在外國考到私家車牌，從此就喜歡車，並愛上速度感。無奈，之後要專注考上工程師，全力在事業上衝刺，有一段時間更長留在南非工作，苦無時間放在玩車上。直到57歲，別人退休之齡，返香港認識到一班同好者，並參加香港汽車會的賽車手訓練，才實踐落場賽車，「有人教真係事半功倍，靠自己摸索有排都達唔到而家嘅水準」。
Allan強調參賽並非想在車壇爭一席位，「我只係當賽車係一種運動，得閒就做吓，有能力咪做囉」。但為了這場澳門盛事，他馬不停蹄，周三在新加坡直飛香港，再轉船到澳門，從早到晚16小時未睡過，「今朝清晨4點就出發，飛到香港時係上午10點，跟住就趕到澳門，驗裝備、較戰車座位，又要出席車手簡介會，仲要試吓賽道」。
第一次出戰澳門街道賽，Allan坦言不熟習賽道，只好努力惡補，「嚟之前不停咁睇賽道圖，死記每個彎位，不停咁睇帶。如果記錯彎位就好危險」！60歲才落場鬥車，Allan毫不介意揶揄自己：「年紀大，記性差，所以要更加要勤力去記。」還笑言：「賽車無年齡限制，佢哋如果笑我，即係輕戰，咁我咪仲有機會贏。」年紀大反應慢是自然的，但年紀大，心態調節好，更會沉着應戰，「50場賽車攞過乜獎？都攞過唔少，但攞唔攞獎唔重要，重要係參加，呢個先係重點」。
最難忘是去年在韓國其中一場賽事，他當時在大直斜路以時速200公里落斜，因剎車過度失控，幸好及時成功救車，「危險？賽車係危險，但如果乜都諗危險，呢種賽車運動就唔使做啦。玩得賽車就要置生死於度外」。每次講及這個問題，Allan都輕鬆以對，「屋企人都唔會擔心，因為我會做足安全措施，我只會參加合法嘅賽車，街道嘅非法賽絕不參加」。
目前擁有兩部愛車的Allan坦言，可能再工作兩、三年就退休，日後會專注打理一個車隊，賽車只當是一項運動，一種減壓運動。「我平時工作壓力好大，但一落場就乜煩事都拋諸腦後，我要全神投入賽事，專心一意應付比賽。」
玩賽車猶如燒銀紙，「參加一場賽車，一般都要25萬，當中包括車輛設備、工程人員等」。那麼，Allan出戰了50場，難道已燒了過千萬元？Allan對此笑而不答，今日專注出戰排位賽的他，直言心情緊張，隨後昂然走向賽道。
最後，Allan以3分15.2秒完成賽事，甫下車就笑說：「應該好過噚日。」得知排第17位後，他明顯有點失望：「唔滿意！機件有問題，因為上斜時油門個腳踏斷咗，控制唔到個油門。希望聽日正式出賽時，唔好出意外，機件生性啦！」
華夏盃小資料：
「華夏賽車大獎賽」簡稱「華夏盃」，2014年首次在澳門舉辦，由中國汽車運動聯合總會（FASC)、香港汽車會（HKAA)、中華台北賽車會（CTMSA) 及中國澳門汽車總會（AAMC)聯合主辦。採用巡迴賽制，於中國、台灣及澳門舉行，參賽戰車是清一色國產北汽紳寶D70，首屆由内地車手朱戴維奪冠。而今屆華夏盃共有21名車手參加，港隊代表有鍾永強、盧家駿、譚耀基及女將楊嘉怡。