陳健波競選財委會主席時，早被泛民質疑佢情緒不穩，估唔到上任唔夠兩個月就現形。噚日人力議員大嚿陳偉業發言，話陳健波有多重身份，出任保險公司高層，有收受利益之嫌後，陳健波情緒即場「大爆炸」，大鬧大嚿「撩人者賤」，強調自己光明正大，同大嚿舌戰一輪後，就突然宣佈休會5分鐘。大嚿就鬧陳健波利用主席權力打壓議員言論。
點知休會期間，長毛梁國雄繼續挑機，話陳健波曾喺立會上朗讀《文匯報》，鬧佢係「反中亂港」，「我都由得你，我有冇叫曾鈺成趕你走？」到咗復會，向來斯文嘅會計界議員梁繼昌亦忍唔住話陳健波無厘頭休會，EQ不足，指做得主席就預咗唔啱聽都要吞咗佢，陳健波就話對梁繼昌言論表示「極大失望」，令梁繼昌嬲到罕有地拍枱離場。辣㷫咁多人，陳健波會後解釋「好谷氣」、「火燒心」，話佢對個人尊嚴好執着。