綽號灰色神獸的「和順超影」上季一出即勝，潘頓連鞭都唔使打，贏馬姿態好似行路咁輕鬆，可惜一剎那光輝唔代表永恆，之後越跑越差，今季由苗廐轉投方嘉柏，亦未見太大起色，最近一仗更大包尾，馬主魏宇與劉賀要拉頭馬，就要寄望周六（21日）同主的在港初出馬「騰龍超影」。
「騰龍超影」亦係高價自購馬，配潘頓列陣第十場二班草地1200米，馬主今次改與蘇保羅馬房合作，希望擦出新火花。無論蘇保羅或潘頓，都讚「騰龍超影」抵港後好快就適應水土，操得食得，狀態一操即起。
「騰龍超影」在悉尼最後兩仗都戴眼罩，分別獲亞、季軍，既然配備幫到手，今仗順理成章繼續使用眼罩。「騰龍超影」季內試過四課大閘，其中三次由潘頓經手，最近兩次均跑第二，走勢甚佳，潘頓話明此駒有望一如「和順超影」初出即取得佳績，但有件事卻令潘頓有些擔心。
他說：「今個月10號『騰龍超影』試1050米泥閘，專登測試佢的轉彎能力，隻馬之前喺悉尼都係跑右轉並贏過，但唔知點解10號嗰課試閘轉彎嗰陣出錯腳，竟然先出左腳，搞到走勢有啲唔順，希望佢出賽時唔會再犯呢種錯誤。」