這天晨課最矚目鏡頭，唔係周六（21日）三場國際二級賽的戰馬加課，亦不是大摩接受訪問，分析該三場大賽旗下各駒機會；而是早前曾經分手的一對騎練潘頓及沈集成，這天終於冰釋前嫌，走番埋一齊，潘頓仲初次接手沈廐明星馬「港林飛魚」。
話說早排潘頓應承沈集成騎「超有利」後，喺排位前突然推庄唔騎，改策「文藝復興」，搞到「超有利」換嘉琦BB只輸半身位跑梗頸四，令沈集成嬲爆，仲因此向競賽董事小組投訴，結果潘頓被判罰五千元。沈集成亦自10月10日賽事後，冇再用潘頓。
本來大家都以為他們一定面左左，殊不知世事如棋，唔知潘頓有乜辦法冧掂沈集成，這天沈集成突然安排「港林飛魚」畀潘頓過檔，與「文武仔」拍跳兩段，操完之後騎練仲傾咗一陣，大家的表情就頗為嚴肅，冇乜笑容，但總算係好開始。
「港林飛魚」至今兩戰一冠一季，公認有高質，騎開此駒的史卓豐稍後停賽，不過就算佢唔停賽，都可能換人，因為上次「港林飛魚」ＷＱ齊撻，唔少人覺得皆因史卓豐騎得差，冇當機立斷早啲發力，而此駒亦正好造就潘頓及沈集成復合。