沉澱了一周，仍未能對華人置業（127）以125億元「天價」、向恒大地產（3333）出售灣仔美國萬通大廈的交易，理順出較「合理」解釋。為甚麼恒大於現市況要以破紀錄呎價買商廈？為甚麼華置接受分6年收取款項？為甚麼過去15個月華置7宗巨額資產交易，3宗都與恒大有關？越想心裏只有越多問號。
有基金朋友說，其實不用想太多，撇除大家也不知道的事，若果將這宗買賣理解為一宗複雜的「連環貸款」，事件就會「合理」些。
朋友說︰「恒大想度水，但由於恒大無抵押品，所以銀行唔借，不過，有人就諗到，不如恒大先高價買咗一啲資產返嚟，再將該資產拿去作為抵押品借錢，咁咪得囉……呢個方法聽落好匪夷所思，因為重點係要搵到有人肯賣舊『抵押品』畀恒大，仲要係做到有『交易時間差』可以還款，但從結果論，恒大做到了。」
真係「咁神奇」？朋友謂︰「若果我冇估錯，之後刊發嘅交易通函，好大可能會有一啲條款，話一旦恒大中途畀唔到錢，就產生類似收回資產嘅效果，保障華置權益。」股壇狙擊手果然名不虛傳。
密西比