長實地產（1113）與新地（016）兩大龍頭發展商，已經好耐冇同一時間喺同一地區有全新樓盤推售。今次元朗新盤大戰，長實世宙同新地沙埔峻巒正面交鋒，兩盤夾埋接近1,500個單位，大家為去貨，未賣已經大戰味濃。
長實執董趙國雄噚日先出口術，暗示世宙今日開價，叫傳媒今日唔好去第二度，仲話「無謂地方唔好去」，意指唔好去其他發展商嘅活動。
對於峻巒都有機會短期內開價，趙國雄初時笑笑口話，大家一齊開盤係好事，氣氛更加之旺云云，但佢轉頭又暗踩峻巒位置偏遠。其實都明白嘅，𠵱家市場估緊美國下月加息，到時可能影響到市場嘅置業信心，難怪樓神緊張啲，寸嘴啲嘅。