不斷求變、敢於創新、突破「快餐」常規，老麥由「秒秒鐘歡聚歡笑」來到今天的「 i'm loving it」。從與人分享共樂到今天的偏走個人、個性化，可算行了一段漫長又艱辛的路。
今時今日做快餐的，除咗要有好多新口味，仲要靠賣質量，即最好話畀個客知𠵱家你只要用廿蚊，就可以買到一百蚊嘅嘢，隨便落街畀幾十蚊都可以食到日式火鍋，連和牛、鮑魚都有交易。以前老麥可以單靠幾款包同汽水賣到成行成市，𠵱家推賣足三両要cross over廚壇魔術師搞間pop-up store，親自炮製幾款與別不同的新包，拍咗多條長長短短的video，生意越嚟越難做！
但點變點創新都好，品牌資產係一個百年品牌極其重要的核心價值。以老麥為例，佢個大人細路都一眼認得嘅M字，同埋即時對於佢嘅種種聯想，自從要i'm loving it走個人態度之後，已經放棄咗唔少令人一見開心的紅黃色調同埋與人分享、having fun的主元素。廣告唔多覺，連餐廳裝修都要走時尚和品味路線，今天的定位，多變到有啲模糊。其實，呢個係一個百年品牌與時並進的必經過程，無可避免，關鍵係點可以做得鮮明及擁有一致性而已。足三両的破格無疑是有話題性亦可以引起購買欲，但係佢嘅宣傳就係絕在無一丁點似老麥，大概這就是它的市場策略取勝之道。一次性的產品推廣可以帶來不俗的生意額、交到數。然而，對於品牌長遠形象的建立，卻似乎沒有甚麼延伸及鞏固作用。
另一個百年品牌，如可口可樂都係行「分享」路線，佢嘅廣告宣傳就來得單一鮮明。與至愛、友伴甚至跨越疆界、膚色一起共享。一用就幾十年。由70年代的Hilltop電視廣告直到現在的宣傳，從包裝玩中英文名用作禮物互相送贈、歌詞寄意、早年在印度與巴基斯坦的販賣機讓分隔兩地的人民分享愛與希望等等，都係來自始終如一的「分享快樂」。不過，可口可樂始終係一支汽水，比快餐行業來得簡單。
文廸晞
mailto:[email protected]