睇過《風雲》嘅朋友相信都記得入面有段金句，大概係咁：「話不可說盡，凡事太盡，緣份勢必早盡。」某大國嘅傳媒話我哋香港係送分童子、球迷又話要教訓吓啲港燦，講到咁盡，最後自己隊波嘅晉級之路都就快行到盡頭。
喺歐洲方面嘅丹麥亦自吃苦果，丹麥球迷唔單止話要一腳踢走瑞典，仲話要順手送伊巴謙莫域一程，叫佢掛靴，點知就激到伊巴大發神威，喺周二嘅歐國附梅開二度，幫瑞典以總比數4:3淘汰丹麥，搭上歐國盃決賽周嘅尾班車。
伊巴寸爆：踢丹麥返歸
伊巴今年都34歲，外界估計出年歐國盃係佢最後一屆大賽，若果瑞典喺歐國附贏唔到丹麥、入唔到決賽周的話，相信佢都會提早退出國家隊。丹麥啲球迷就囂嘞，話要踢瑞典出局，幫伊巴掛靴。作為球壇呂布，俾啲無名鼠輩咁激一激，伊巴即刻戰鬥力大增，喺周二場附加賽次回合，幫瑞典攻入兩球，雖然丹麥最後追平2:2完場，但計埋首回合，瑞典就以4:3力克丹麥晉級。大家下年仲可以喺法國嘅歐國盃決賽周睇到「呂布」嘅英姿！
賽後，寸爆球壇嘅伊巴將矛頭直指嗰班不識好歹嘅丹麥球迷：「有人話要踢我去掛靴，但我𠵱家將佢哋成個國家踢返屋企！呢個係命運，我要喺歐國盃完結我嘅國家隊生涯，好多人話我又老又殘，但事實唔係佢哋咁諗。」
執教15年 M奧臣請辭
瑞典教練夏倫都覺得成隊波一吐烏氣，「我哋真係好開心，有人話我哋係史上最差嘅瑞典國家隊，但我哋入到決賽周喎。」伊巴嘅入波唔單止踢走丹麥，仲連執教咗丹麥15年嘅老帥M奧臣都喺賽後辭職。
同日另一場歐國附次回合，烏克蘭作客以1:1踢和斯洛文尼亞，兩回合贏3:1晉級，同瑞典一齊搭上尾班車。
24支歐國盃決賽周參賽隊伍全部出爐，法國、西班牙、德國、英格蘭、葡萄牙同比利時被列為種籽，而意大利就喺第二檔；至於威爾斯同北愛爾蘭就喺第四檔。抽籤儀式會喺下個月12號舉行，由於呢屆歐國盃擴大咗，比起往年多咗八隊，所以分組賽會有六組，除咗小組頭兩名可以入到淘汰賽之外，仲有四支最佳第三名可以入16強。