最近咳到甩肺都有返工，只係請咗一日病假，費事咳得厲害嚇親同事，咁啱友邦保險（1299）噚日公佈一個關於打工仔請病假嘅調查，500名受訪打工仔當中，平均每年只係請3.3日病假，仲有接近九成人會帶病返工，認真勤力呀。
根據勞工法例第五章關於疾病津貼嘅部份，僱員初受僱首12個月內，每服務滿1個月，就可累積2日有薪病假，之後每月可累積4日。
雖然有假可放，但調查話香港打工仔好少放病假，受訪者當中，只有12%曾因家庭問題、見工、生日等理由詐病，超過七成人，一年請病假少於5日。
調查話，近九成港人習慣帶病返工，原因包括工作太繁忙，冇時間睇醫生，覺得冇需要治療，病痛會自己好番等。為免傳染畀人，有病都係請日假睇醫生吧。