巴黎上周五發生恐襲，不過法國同英格蘭冇向恐怖分子低頭，前日照喺後者主場溫布萊踢友賽，賽前仲合唱法國國歌《馬賽進行曲》。但另一邊廂嘅德國，因為球場受到炸彈威脅，所以德國迎戰荷蘭場友賽就喺開波前90分鐘取消。
英格蘭憑迪利阿里同朗尼上下半場各入一粒，以2:0贏咗有曼聯前鋒安東尼馬迪爾傷出嘅法國，但賽果唔係呢場波嘅重點，而係大家對抗恐怖主義嘅決心。賽前英法球員同現場超過七萬球迷，包括劍橋公爵威廉王子、首相卡梅倫同埋阿仙奴領隊雲格等，一齊高唱《馬賽進行曲》，溫布萊球場嘅拱門亦變成代表法國國旗嘅藍白紅三種顏色。法國國家隊教練迪甘斯同埋隊長洛里斯表示非常感謝英國對佢哋嘅支持。另外，法國嘅聯賽今周會照踢，但基於保安理由，客隊球迷就唔准入場。
至於德國前日本來喺漢諾威約戰荷蘭，德國總理默克爾亦係座上客之一，惟因球場受到炸彈威脅，所以開波前90分鐘決定取消。雖然呢場友賽打唔成，不過德國聯賽會同德國足總就表示，喺周五重開嘅德甲會如常照踢，但就會同有關方面傾吓點樣加強保安工作。