「魚唔過塘唔得大，出外闖一闖，多見識世面對佢更有幫助，佢值得有呢種機會。」說時中氣十足，正是快將67歲的盧國華（人稱盧sir）。這位70年代港足門將桃李滿門，高足包括在周二港中戰再建奇功的鋼門葉鴻輝，盧sir期望徒弟在世盃外贏取的掌聲，能成為愛徒日後外闖的本錢，可惜時勢造英雄，盧sir慨嘆，今日難再練出另一個「英雄輝」。
訪問當天，正值盧sir帶領的英華書院出戰中學校際足球賽，全場指揮每位隊員，在球場上稍有行差踏錯，身為領隊的他就大吼大叫，肉緊程度比身旁的教練多出百倍，他說：「呢把聲係後生時踢龍門練出嚟嘅，嗰陣可以由自己龍門位置叫到對面龍門，之後做教練又要大嗌大叫，習慣咗就冇難度。」
明年一月就滿67歲的盧sir，5呎11吋的身形壓場感十足，其職業球員生涯由1967年到1984年，效力過多間球會及多次代表港足出戰，退役後轉為守門員教練，得意弟子正是近半年七場世盃外、足足有六場零封對手的葉鴻輝。
四年間傳授把關技術
13至16歲跟盧sir學足四年的英雄輝，與訪問當日這班學生的年齡相若，人們愛說「時勢造英雄」，盧sir坦言阿輝當年除佔有天時地利外，還有他的決心、鬥心，以及願意苦練；來到今時今日，想再練出另一個「英雄輝」也困難：「阿輝03年開始跟我，係港青代表隊，白紙一張，你教佢乜都全吸收，一跟就四年，每星期放學後練五日，每次三個鐘，當時又有自己球場（馬仔坑）做青訓，全個球場自己用晒，唔使好似𠵱家，練一個鐘就俾人趕走。𠵱家就算教到一個有潛質嘅，踢出成績之後就被球會挖角，跟其他人練另外一套，好難控制到質素。有啲細路到足球與學業二選一嘅時候，好多都放棄足球；阿輝係我近十幾年教波以來，難得一見最有決心做職業球員嘅小朋友。」
盧sir讚愛徒有heart
盧sir教導阿輝四年間，除港青外，亦兼教四、五間學校足球隊，港青每日練至晚上九時，雖已身心俱疲，但每次看見阿輝用心練習，盧sir也忘卻疲累：「我哋嗰時港青守門員有六、七個，訓練強度好大，一連三個鐘，佢冇講過一句話辛苦，佢天生躁底，但只會忟憎自己點解練唔好，你又點唔落足心機去教呢？」
盧sir與阿輝情同父子，每逢大時大節聚會，阿輝一定到場。盧sir未踢過世界盃外圍賽，現在徒弟為他實現夢想。「70年代踢港足嗰陣，有機會到南韓踢世盃外，可惜當時自己係三號門將，最後落選，不過我對足球冇遺憾，始終係足球養活我大半生，除揸過兩年的士，其餘時間都離唔開球圈。目前阿輝喺世盃外踢出名堂，我仲邊有遺憾？」曾效力東方、東昇，最後在先特霸收山，亦在90年代末第一位北上當教練的香港人，難怪他指足球帶給他都是開心的回憶。
「佢值得有呢種機會」
由今年六月世盃外逼爆旺角場，屢救險球開始，葉鴻輝繼09東亞運奪金後再次成為英雄，場場世盃外都在家裏看直播的盧sir，雖然希望徒弟改善躁動的性格，不過亦理解球員心態，「如果冇阿輝嗰團火，又未必打得出佢嗰種激情。」
葉鴻輝曾於13年獲中超球隊貴州人和招手，可惜最後未能以內援身份註冊，衝出香港夢無疾而終，而盧sir亦希望這位徒弟早日償願，「佢正值黃金期，以佢嘅身手，絕對有能力喺亞洲，好似日本、新加坡、馬來西亞等球會搵食，外闖過嘅經歷真係好唔同，佢值得有呢種機會。」
記者：徐嘉華 攝影：李家浩
盧國華小檔案
‧年齡：66歲
‧身高：5呎11吋
‧位置：門將（退役後轉做守門員教練）
‧球員生涯：1967-1984年
‧現職：英華書院足球隊領隊
‧香港代表隊：1971-1980年
‧曾效力球隊：電話、東方、東昇、愉園、先特霸
‧中國教練年份：97年廣州太陽神、01年吉利
‧開辦公司：05年創辦雅利體育公司