聞說81歲「舖王波叔」鄧成波就快抱孫喇！波叔平時甚少提及家事，近年佢先至將孻仔鄧耀昇（Stan）介紹畀大家認識，Stan仲係好年輕，今年都係得28歲，聽聞佢太太葉靄璇（Vicky）最近向朋友宣佈有喜，波叔就順理成章做阿爺，值得恭喜。
華華噚日第一時間透過WhatsApp恭喜Stan，不過Stan就話暫時冇回應，只係用咗個咧齒笑嘅表情符號表達心情。Stan同Vicky舊年3月拉埋天窗，結婚未夠兩年即有喜，難怪Vicky都按捺不住興奮心情，對外宣佈喜訊。
Stan近年百足咁多爪，除咗跟隨波叔打理家族物業投資王國之外，仲涉獵飲食、婚禮統籌、教育等各行業。佢同太太Vicky更加係拍住上一齊大搞婚禮統籌公司「拉斐特」。