內地藝人趙薇近年高調投資港股，舊年入股阿里影業（1060）後，最近仲以基礎投資者身份入股創業板新股中國創意（8368）。中國創意噚日掛牌，趙薇專登去交易所主持上市儀式。
可能上市儀式唔同電影首映禮或花生騷，趙薇噚日着得比較平實，簡單一套粉紅色套裝，首飾唔多，唔係好似有啲上市公司老闆娘，着到珠光寶氣嗰種。不過呢隻粉紅色好似幾蝦人着，滲出咗少少「娘」味。
趙薇噚日全程相當興奮，朝早9點半開市嗰刻，佢跟中國創意主席楊劍一齊敲鑼，趙薇敲完一下，再敲三下旺場，之後周圍行咗陣參觀。
佢真係旺呀，中國創意噚日收報4元，較招股價狂升9.25倍，趙薇買入5,400萬股，單日賬面賺1.95億元，雖然有半年禁售期，但睇到都開心喇。
另外，之前市場有傳聞話王菲亦有份入股中國創意，楊劍噚日冇正面回應，只係話好多投資者都有興趣，但難免出現「順得哥情失嫂意」情況。