再鋒利嘅刀都有生銹嘅一日，新民黨主席葉劉淑儀咁英明嘅人，都有講錯嘢嘅時候！葉劉噚日早上主持人事編制小組，口快快宣佈人民力量大嚿陳偉業被「處決」，搞到要向大嚿耍冧！
小組昨討論為機場三跑而開設嘅3個機場擴建工程統籌辦公室職位，大嚿就此提出11個議案，葉劉話有8個性質相同，可以整合，既然唔算多，為咗畀大嚿表達意見而獲准提出。
第一個議案投票後，葉劉宣佈結果時竟然話：「陳偉業嘅議員（案）被否決、處決」，在場人士嘩嘩聲，葉劉即刻糾正；長毛抽水叫葉劉唔好處決大嚿，大嚿就話知葉劉想「處決」佢好耐，但自命「冇咁容易瓜嘅」。