正當大家要同新城市廣場、有20年歷史嘅馬莎百貨分店「忍着淚說Goodbye」之時，佢竟然以全新姿態殺入旺角朗豪坊！今次呢間英國最大型的連鎖百貨Marks ＆ Spencer就唔賣衫、唔賣家品，清一色淨係賣嘢食，而且仲係第一次加入熟食區〝Hot Food to Go〞，售賣例如咖啡、湯、麵包、三文治及芝士條等熱食。
話晒係全亞洲最大嘅馬莎食品專門店，趁上星期新開幕，率先去行咗轉。專門店喺朗豪坊B2，即係港鐵站出口個層，但要先經過另一間超市行到尾至搵到，地點算方便，不過要考考眼力及耐性。正門當眼位就係新加入嘅小型熟食區，賣即點用餐，旁邊仲有個小角落可以畀食客即買即食，方便附近嘅OL lunchtime嚟唞唞。試咗店家推介嘅Chai Tea Latte，即係鮮奶香草茶，好似飲緊印度奶茶咁，奶滑又帶陣陣香草甘甜，熱辣辣＄33一杯的確唔錯。
再行入啲就到大家最關心嘅食品區，印象最深就係超市最右邊的冷藏區，售賣如沙律菜、芝士、cold cut、魚、烤雞、醬料、乳酪等食物，甚至係意式、印度式食品及薄餅等等，分門別類整齊排喺一個架上。例如醬料區，直排售貨架上全部只賣醬料，超過30款以上選擇，包裝又精美，啱晒想食得健康嘅單身人士，只要由頭行到尾，由蔬菜、生果、醬汁、魚或肉逐款揀，就可以DIY今晚餐飯。或者成個pizza、成隻烤雞買返屋企又得，非常方便。不過，由於馬莎賣嘅食物係主打天然、新鮮及健康，所以價格會相對一般超市貴，但整體嚟講，喺旺角較少同類嘅食品專門店，絕對係鍾意行超市嘅「超市控」不錯選擇。
記者、攝影︰黃依情