性感女神周秀娜跳到影視層面一段日子，不甘原地踏步的她最近再求新，推童真繪畫本，又初嘗格蘭披治賽車滋味。賽車初哥勇字當頭，自以為上手就心急踩油門，結果過彎狂打白鴿轉，繼而猛力撞牆，幸好有驚無險。感情都勇於求變，經過三年真空期，終敢於主動出擊，無奈緣份未到，只好慨嘆「熟習一個人嘅感覺多啲」。
造型、撰文：林嘉慈
攝影：周樂恒
化妝：Circle Cheung of ndnco.co
髮型：Daniel Cheng assisted by Liki Chow of Salon Amarone
猶記得周秀娜大半年前接受《add》訪問，口口聲聲表示單身快樂，這次再談感情事，乾旱三年的她轉軚，出口求愛，「熟習一個人嘅感覺多啲，但我都想拍拖！」主動追求合適的人？「我𠵱家會，哈哈，好似朋友咁去認識。」有空就積極約朋友食飯聯誼，敢愛不是因30歲大關推動，「𠵱家覺得有啲男仔係你必須要有啲表示，佢先會察覺得到，又或者可能好多男仔都怕醜，佢未必會夠膽同你表示啲乜嘢，可以雙方面。」
渴求真愛
周秀娜將參與內地人氣配對節目《我們相愛吧》，越睇越恨拍拖，「鍾意劉雯同崔始源嗰pair，渴望似佢哋咁，份感情好真實，開頭好尷尬，唔了解對方，跟住去揣摩、猜測，互相了解個過程好真，睇得出好鍾意，對對方好坦白，但未搵到一個人，可以好似佢哋相處得好舒服嘅感覺。」 恨拍拖也可以很理智，不求純粹為告別單身而盲揀男友，「其實自己一個人，都有自己一個人嘅開心，有一個人嘅自由，我本身屬於好需要有自己空間，同埋鍾意自由嘅人。」
早前被拍得孖男友人行街，親密得獲男方幫手整理褲頭，她澄清對方只是了解自己置裝需要的好友，但承認細心是打動芳心的條件，「細心係佢留唔留意你，了唔了解你嘅需要，相處落就知道，一個人鍾意你係會好sensitive，會好清楚你鍾意啲乜，一定係佢成日留意你先察覺得到。」高大靚仔是bonus，「唔認識，一定係由外表開始先，第一印象要乾淨同有禮貌，相處落又未必以樣行先。」
挑戰賽車
周秀娜熱衷新嘗試，參加澳門格蘭披治明星賽是今年其中一項新挑戰，與愛車之人余文樂、吳尊、方力申等同場較量，明天排位賽過後，後日展開十圈賽事，「喺香港唔揸車，自己有車牌，反而係為咗賽車，返嚟香港真係買咗架車，因為我想賽車嗰陣，千祈唔好危害其他人嘅生命，亦都唔好危害我自己嘅生命。」賽前到珠海練習幾天，對棍波零概念的新手，笑料百出，「記得頭兩日係用一個波就行晒全程，其實轉彎位要轉低波會易啲，但我全程用三波，搞到自己賽完好似沖完涼咁。」
經過教練狠批、睇片掌握概念，鬥心更旺，到第四日練習，自覺學懂，放膽去衝就出意外，「喺一個好大嘅彎，覺得個彎大冇乜問題，就加大畀油，點知就出事。其實轉彎係唔可以畀油，咁我心急咗，喺個彎度打咗好多個白鴿轉，然後就撞咗埋牆，第一次咁，個腦一片空白，我諗住踩迫力，變咗踩油。」意外留下陰影，比賽日但求安全完成賽事，「唔好咁大想頭諗住拎名次，希望唔係包尾第一。」
童心解憂
昔日的寫真女王，今日轉為推繪畫本，配合本地創作單位Chocolate Rain的童心公仔，將失意時接收的窩心話公諸同好，「唔同階段做唔同嘅嘢，冇理由年年都出一本寫真。」上網、音樂、電影，讓周秀娜解開工作與生活的鬱結，最受妮坦莉寶雯（ Natalie Portman）主演的《黑天鵝》（ Black Swan）觸動，「好多時我哋覺得自己做唔到，好多唔同煩惱，永遠最大敵人係自己，我都有呢個煩惱，諗奇奇怪怪嘅嘢，諗唔出答案。」
性感未遠去
周秀娜的性感年代並未遠去，間中為自家內衣品牌laanaa賣廣告，賣身材又賣腦，「想做其他嘗試，同其他牌子合作，或者做其他產品，鍾意香水，鍾意香水樽、香味嘢，香味好代表一個人，想整一隻好屬於自己嘅香水，介乎甜甜地，帶花香味道，即係輕熟女。」網購平台主攻內地，香港、星馬是夢想銷售據點，更視美國內衣品牌Victoria's Secret為目標，「有化妝品、化妝袋、香水，女仔入到去，由頭到腳都包裝到。」
更多精采時尚內容，盡在 http://add.appledaily.com 。
