滬港通一周年，筆者特登馬後炮搵返舊年通車前，有關滬港通嘅大行報告出嚟睇。大行當時普遍預期，AH股差價會因滬港通而收窄，今日睇返固之然係得啖笑，而大行對於滬港通可以吸引外資投資A股嘅憧憬，到今時今日當然亦仍然只係一個憧憬，因為滬股通3,000億元人民幣嘅總投資額度，開通一年來只用咗40.3%。
滙豐一年前預計，滬港通開通之後，外國投資者喺未來三至五年，可推動機構投資者持有A股嘅比例增加最少5至8百分點。不過根據家陣滬股通嘅市場反應嚟睇，呢個預測落空嘅機會居多。
點解外國投資者對滬港通缺乏興趣？睇吓喺美國上市嘅中概股就會明白。中概股整體表現不但跑輸美股大市，亦經常成為沽空機構嘅狙擊目標，反映即使撇除估值問題，以中國現時大多數企業嘅質素，外資狙擊中國企業嘅興趣似乎大過買入。
中概股近月掀起從美國回流中國上市嘅潮流，即使係今年夏天嘅A股股災，亦無阻中概股回流祖國嘅趨勢，原因係呢啲公司認為，喺中國上市嘅估值可高於喺美國上市嘅估值。由此可見，同一間中國上市公司，喺外國投資者同中國投資者眼中，價值可以有幾大分別。
滬綜指嘅長期走勢圖顯示，自今年6月中5178點嘅高位計，滬股已進入長期跌浪，呢輪跌浪只係行咗一半，最悲觀情況落返去2000點上下。畢竟股市長期走勢都係跟返經濟行，中國經濟放緩係不爭事實，減息降準嘅刺激效用又有限，而經濟結構改革呢啲嘢，更加唔係兩、三年就可以完全見效。筆者認為，對於一眾散戶嚟講，A股ETF短炒當然冇所謂，長揸就真係唔知要坐幾多年艇。
El.
本欄逢周二、四、五刊出