【本報訊】「每次大賽過後一定失眠。」英雄也是尋常人，剛睡醒就接受訪問的葉鴻輝一面笑容，全不似兩番將中國隊擋於門外的「英雄輝」，外闖夢未圓，要贏卡塔爾出線世盃12強賽的夢亦未圓，葉鴻輝說要抱住這團火，更要像意大利鋼門保方般踢到37歲，一直守住國家大門。
記者：徐嘉華
前晚賽和中國後，葉鴻輝鬧失眠，眼光光到翌日8時才能入睡。「其實我每次大賽過後一定失眠，反正今（昨）日唔使操練，就喺日頭瞓個夠」，昨日黃昏相約他到青衣做訪問，葉睡眼惺忪但笑容滿面。前日港中大戰葉鴻輝屢救險球，下半場更神救中國于大寶近射，其實他一向抗拒「英雄輝」這名堂：「我都係鍾意人哋叫我阿輝，踢一場好波不單止我嘅功勞，由教練到管理、物理治療師、職球員都有付出，我落到場只係做自己嘅責任。」
盼贏卡塔爾保出線希望
再一次擋住國足攻勢，最後0：0完場，香港球迷自然想起9月初作客深圳一役。該仗香港同樣守和中國，插曲是鄭智辱罵倒地的阿輝是「狗」，阿輝直言就算到比賽前一天，也沒多想如何面對鄭智，昨日亦再講一次自己的普通話不差：「我小學就學國語，不會連『狗』同『久』咁簡單嘅普通話都分唔到；其實球場上有磨擦或者口角都好正常，場波過去咗，就毋須再回想，開賽時我同有同佢握手。」
有人認為以前「躁爆」的阿輝在港中戰明顯冷靜很多，阿輝指多得隊長臂章及累積的經驗，他表示：「我係好勝心強嘅人，有時會過火，但經過呢幾年比賽，發現脾氣過大會影響球隊發揮，港中呢場波，場上都有啲碰撞，我亦冇受影響，加上𠵱家係隊長，唔可以因為自己情緒影響隊友。」
由6月中鬥不丹計起，港足踢了7場世盃外，有6場零封對手，只是在最強的卡塔爾身上失了3球，阿輝給自己7分；阿輝希望在明年3月煞科戰表現更好，為香港重燃世界盃美夢，他說：「卡塔爾實力比我哋好，但我哋作客深圳都能賽和中國，只要相信，咩都可能發生。」
早早成名，阿輝今年不過25歲，對於門將來說仍是成長期，阿輝期望盡早圓外闖夢，他笑言有點妒忌港足隊友如陳肇麒、郭建邦等曾到中國落班，「見到他們一個個外闖，都有點不甘心，好恨出去踢波，試試自己有沒有能力在外面企穩陣腳」。在前年曾獲中超貴州人和看中，可惜最後因內援、外援身份致無疾而終，阿輝從不讓心中的火熄滅，他更希望像意大利的保方一樣，踢到近四字頭也不言棄。
