香港足球隊周二晚踢咗場好波，頂住國足攻勢力保不失，有政商界中人睇完好興奮，仲套用喺香港社會情況，覺得恍如打咗支強心針，皆因面對阿爺喺多項議題上強攻，港人必須團結死守。講到呢度，佢話鋒一轉，話有位大孖沙，其實都好有呢種堅毅不屈嘅精神，就係長和系主席李嘉誠，君不見超人力抗阿爺無理打壓後，官媒已經唔敢再出聲，甚至有傳阿爺都唔想失去超人支持，雙方已講掂數和好如初喎！
超人反攻 風波暫歇
聽落又似係喎。內地官媒較早前，接連發文批李嘉誠遷冊之舉，雖則阿爺向外放風，並冇親自落柯打，但熟悉中國政情人士異口同聲話，如果阿爺要㩒呢啲評論，輕而易舉，但最終卻由得佢發酵，變相默許，加上唔知有啲乜人，衰衰咁冒認超人向外發短訊「解畫」，卻暗藏自批，難怪超人動真氣，親自出水蛇春聲明嚴正澄清。
而有關聲明發出後，針對超人嘅攻擊，暫時告一段落。有花生友話喎，聽聞超人同北京有關方面冷靜落嚟後，雙方已有溝通，互相闡明立場，最近已冰釋前嫌，和好如初，與此同時，又有傳長和系未來喺中國某大城市有一項投資。點解有呢啲消息傳出？花生友都唔知，但相嗌唔好口吖嘛，繼續互批似乎又冇乜謂喎！
花生友
周二、四刊出