巴黎恐襲發生至今，當地仍然人心惶惶，但環球股市無被震散，反而迅速彈升。呢個可能係國際反恐行動，若果伊斯蘭國事先沽定期指，等事發後股市恐慌大跌賺錢，咁就唔可以畀佢得逞。據伊斯蘭國官方數據，舊年收入20億美元，肯定報細數。
歐美股市其實未擺脫恐襲陰影，隔晚德國球場及火車站收到炸彈威脅，美股升幅全消。中港股市昨亦回調，滬綜指跌1.01%，收報3568；恒指跌0.34%，收報22188，再度失守50日線。幸而兩地都係跌市成交縮，沽壓唔太大。
中證監反貪腐捉內鬼之火越燒越烈！昨有消息指中證監稽查總隊副總隊長習龍生被帶走，係繼上周五中證監副主席姚剛被查後，再有人出事。姚剛有「發審皇帝」之稱，7、8月股災期間，與另一位副主席劉新華（已於近日退休）及主席助理張育軍（已於9月被查）係救市舵手；如今，救市三人組，一個退，兩個落馬。此情此景，似曾相識。17年前香港打大鱷，當時的舵手係任志剛、許仕仁、曾蔭權；如今，殺鱷三劍俠，一個退，兩個涉貪，令人欷歔！
平保互聯網瓣數多
外資對A股似有戒心，滬股通近期持續錄得淨流出，不計昨日，已連續21日錄得淨流出，合共走資250億元人民幣；一個月間，持倉總額大減近兩成。本月迄今，三大A股ETF已發行單位亦減少，走資近30億元人民幣。
中外市況存暗湧，要做好風險管理。若想入市，可考慮落注投資高手上。市場好多高手，但股災都贏到錢嘅就唔多，我講嘅高手來自內險股。A股上季大跌，對內險投資收益不利，但早前公佈的季績，除了國壽（2628）較差外，平保（2318）、太保（2601）、新華（1336）都好過市場預期。期內，太保投資收益升14.6%、平保升13.3%、新華跌13.9%、國壽（2628）跌37.1%。好明顯，太保、平保係投資高手。
二選一，揀平保，話晒係藍籌，較穩陣。平保有保險、銀行、投資三瓣核心業務，又於3年前開始佈局互聯網，現時互聯網金融業務涵蓋醫、食、住、行、玩，係「互聯網+」受惠股。平保9月初已見底回升，9月中升破5月高位展開的下降通道阻力，意味調整浪完成，並再展升浪。昨日收報43.95元，下跌0.45%，首個目標55元。
割柑人
本欄逢周四刊出