今個禮拜六（21日）馬圈有件喜事，前世界馬王「爪皇凌雨」馬主，已故舖王周南之子周漢文，將會迎娶拍拖多年嘅嘉琪妹。
不過大家唔好誤會，嫁人嘅唔係現役女騎師蔣嘉琦，而係嘉琦嘅師姐，前見習學員林嘉琪。
對於即將進入人生另一階段，一對新人都難免緊張，唔想接受訪問，而「爪皇凌雨」嘅練霍利時就恭喜佢哋：「我祝福Raymond（周漢文）及Christy（林嘉琪）有一個開心及充滿喜悦的婚禮，並祝福他們的婚姻幸福美滿。」
佢哋兩個都算門當戶對，嘉琪爸爸林樂洲亦係馬主，過去養過三捷的「易發得」及贏過四場的「保發得」。嘉琪近年已經冇做騎馬人，全心照顧周漢文，而佢未來老公除咗喜歡賽馬外，仲好鍾意收藏幪面超人公仔及玩名錶。
周漢文為咗今次婚宴，仲親自設計咗喜帖，以美國隊長做主題，真係童心未泯。最可惜係周媽媽朱美屏隻「爪皇烈焰」，今個禮拜六賽事冇份跑，如果唔係當日周漢文有望下午拉完頭馬，晚上就拖新娘，咁就喜上加喜咯！