練馬師容天鵬2013年才升正開倉，至今無論成績或口碑，均相當不錯，但礙於廐內高班馬不多，來倉至今冇贏過大賽，連一班賽頭馬亦極少，不過今季他有望扭轉此局面，蓋早前容天鵬有匹4歲澳洲自購馬「嘉應之友」運港，評分高達89分，成為容廐暫時最高分馬，當然唔簡單。
「嘉應之友」抵港後雖未上陣，但可以話適應極佳，這天由潘頓操刀，試沙田第一組1000米草閘，沿途守第五位，靠外欄走輕騎追上，加速反應甚佳，最終以佳勢超越對手勝出，腳法純熟鬥心亦強，亞、季軍是「軍勇戰神」、「鋒芒畢露」。
「嘉應之友」評咁高分梗有道理，佢係澳洲級際賽常客，曾勝昆士蘭鷹園1600米一級賽阿堅斯錦標，亦係滿利谷1600米二級賽史德錦標冠軍，乃容天鵬開倉至今級數最高自購馬，唔使講未來目標一定係經典一哩賽。