阿里巴巴創辦人馬雲今年初話要一擲10億元成立「香港青年企業家基金」，嚟到年尾，呢件事終於見到影，有啲眉目嘞！
阿里噚日話，將於本周四召開記者會啟動「香港創業者基金」，指呢個基金係要支持香港創業者開拓事業，培養企業家精神云云，到時會介紹基金嘅具體運作，不過大家最關心都係點樣申請，要符合乜嘢條件㗎啫。
其實細心啲咁去睇，𠵱家呢個基金名，同年初馬雲講嗰個有些少不同，究竟裏面有冇乜嘢玄機呢？可惜，據聞馬雲周四唔會出現，大家唔可以直接問佢。
話時話，馬雲之前都講過，計劃每年挑選200名香港畢業生，到阿里或「生態體系內的其他公司」實習，呢個計劃好似就拖住先，明年先會招聘首批畢業生去實習。