呢排政界中人話有個問題幾乎答到口臭：「你撐港隊定中國隊呀？」
查實傳媒關注，無非因為政圈盛傳梁振英落柯打，唔畀官員入場，口講撐港隊都唔得，以免政治不正確，咁傳媒梗係想知，有咩政界中人咁細膽怕政治表態？
本身係立法會足球隊成員嘅民建聯陳克勤話，實在太多記者問佢呢個問題，而佢似乎嫌就咁答撐邊隊唔夠創意，所以抽民政事務局局長劉江華水。
陳克勤喺facebook貼上劉華2012年參加立法會「超級區議會」界別嘅宣傳海報「香港要贏」（圖），同時加入港中大戰資料，留言：「 唔好再問我今晚中港大戰撐邊隊嘞，我撐局長，我撐劉華，最緊要──香港要贏。」
當年出咗呢個霸氣競選口號嘅劉華，最終輸咗喎……好彩劉華魔咒失靈咋，港隊最終守和0︰0。