【文化籽：籽談風月】
對性好奇係男人天性，三十年前無電腦無上網年代，試問邊個70後未經歷過徘徊報紙檔、鼓起勇氣但又鬼鬼祟祟咁同報紙佬講：「唔該《龍虎門》搭多本《龍虎豹》吖？」當年宅男不但床板下暗藏鹹書，就連家中遊戲機，都有本事去九龍城龍珠商場，搵相熟老細買地下版鹹game。乜話？你未經歷過偷睇鹹書偷玩鹹game嘅日子？咁仲有乜童年回憶呀？
一接到柯打要做風月game專題，即刻搵班豬朋狗友幫拖，六七條友個個身懷絕game，坐埋一齊狂噴口水想當年，但一講到上鏡拍動新聞，即時個個話有家有室驚影響埋份工，幾乎反面咁滯，背面打格仔back light全部冇得傾。冇咗呢班老宅男現身說法係好可惜，好彩佢哋個個都交到功課，帶晒珍藏好嘢出嚟，我總算可以介紹畀讀者一開眼界。
地下流出 古董鹹game索價過千
我係七十後，唔計40年前「兩碌棍一粒的」就可以打成日嘅雅達利《Tennis》，最快接觸到嘅遊戲機都算係任天堂紅白機喇。呢部全球賣出6,000萬部嘅「神機」，簡直係當年小朋友界嘅身份象徵，未玩過《孖寶兄弟》都唔使旨意埋到男仔堆。唔講你未必知，當年地下渠道出現過紅白機鹹濕帶《AV Big Chance》，有山下麻衣、小澤奈美等AV女優陪你玩老虎機，轉中三條7仲會剝衫畀你睇，以紅白機當年嘅8-bit機能，女優個樣一定起晒格兼唔多似人，宅男們只能閉眼意會，你話佢係張栢芝都得，總之小伙子已經覺得好過癮。
呢類鹹帶當然唔係經任天堂授權推出啦，不過由於紅白機實在太普及，好多「有心人」都會製作呢類同人game分享，透過地下渠道銷售，當年都係賣幾十蚊一盒，到今日已經係珍藏級古董喇，搵到都要三百蚊以上，而畫質好得多嘅超任暗黑鹹帶仲貴，閒閒哋過千蚊一盒，以《SM調教師「瞳」》為例，店舖索價超過$1,500。
戴3D眼鏡玩 虛擬影裙底有獎
玩咗咁多年「邪帶」，大家習慣都係玩個feel啫，直至去到1993年LaserActive主機推出後，先係最大震撼彈。呢部突破性以大大隻laser disc雷射光碟做儲存媒介嘅遊戲機，唔單止播到雷射影碟睇戲，仲可以配搭唔同附加模組，玩埋世嘉MegaDrive同PC Engine啲game，功能強勁到爆，雖然主機賣成五六千蚊，game又貴，不過依然係機迷搶手貨。雷射碟咁高科技，地下商人已經唔可以好似遊戲帶咁，換粒儲存ROM就可以自己出game，不過又咪以為呢部機可以擺脫到鹹game，真正遊戲商Transpegasus睇中LaserActive播片功能，推出咗《Virtual Cameraman》影相game系列，入面有三個樣靚身材正（當年嚟計）嘅女優，喺美麗景色下狂擺pose，玩家就負責搵角度影靚相，影到裙底又或角度夠賤夠抵死、得到系統評高分嘅話，女優就會逐件衫剝，到最後仲會露埋點㖭。最最最抵死嘅，係隻game仲支援3D立體眼鏡，據有玩過嘅老死形容，真係感受到女優嘅玲瓏浮凸美態，心入面嘅罪惡感同快感不斷互相衝擊，睇到小伙子充晒血咁話（個腦）。唔怪得《國產凌凌漆》陀地如花都話：「戴3D眼鏡睇過癮啲㗎。」
細路仔唔怕醜 當街當巷「H連打」
要數鹹game，當然唔少得個人電腦DOS年代嘅一堆作品，由於程式易寫易複製，幾蚊隻磁碟抄完又抄，作品數量同流通量都大得多，而且普遍都係超大膽露骨，連強姦情節同用乜器具都可以揀。但實在太黑暗太邪惡喇，都係成年人玩居多，細路仔反而唔多敢幫襯。
當然，街機都避唔到滲入色情元素，啤牌、老虎機過關都有性感靚女睇，就連《泡泡龍》、《桌球》等都俾人改到背景有露點靚女。而最出名嘅，肯肯定係《麻雀學園》系列嘅「H連打」，當食到大牌，就可狂㩒麻雀game專用keyboard上嘅H掣，畫面上嘅女角就會跟隨你節奏而「有所動作」，互動元素高到爆燈。仲記得當年喺機舖，一有人「啪啪啪」喪㩒，總會引到附近嘅麻甩仔湧埋嚟睇嘢，細路仔唔識嘢覺得好玩，𠵱家諗番轉頭，其實都幾不雅。
後話：舊game有想像空間
雖然家陣電腦效能強勁，網上資訊又發達，睇鹹片玩鹹game已唾手可得，而且仲要幾真幾靚都有，不過就冇咗當年8-bit鹹相起晒格仔，要瞇起眼睇嗰種想像力延伸，就係呢種廣闊嘅想像空間，反而令人有無限遐想，鍾意邊個咪幻想邊個囉。估唔到鹹game同電影一樣，都係舊嘢可堪回味啲。
撰文：龍叔叔
編輯：陳漢榮
美術：楊永昌