綠色力量連續第4年舉辦全港大型節水減碳活動「沖沖五分鐘」，主要推動市民，沖涼5分鐘就夠嘞，今年仲特別推出免費嘅「沖沖五分鐘」流動應用程式，特設4種計時器包括水聲感應、〈Shower Song〉歌曲、沙漏同時鐘計時；其中水聲感應計時器可自動感應花灑水聲，只要用家關掉花灑，計時器會自動暫停；花灑再開動先再計時，準確計算用水時間。
程式亦包括養育WaterBaby水滴公仔，用家持續挑戰5分鐘內完成淋浴，WaterBaby就會越來越有活力；每次成功挑戰仲可獲WaterCoin，為Baby添置衣飾、玩具等物品。
如果全港市民將沖涼時間控制喺5分鐘內，綠色力量話每人每年可減碳11公斤，全港一年可減碳78,000公噸。剛宣佈結婚嘅Ivana王菀之（圖）續任活動大使，拍住WaterBaby一齊減碳。