滬港通眨眼就一歲大，港交所（388）噚日喺交易所展覽廳舉行酒會，金融界有近200人捧場，最難得係港交所三代主席都有到。行政總裁李小加（Charles Li）見到第一代主席李業廣（Charles Lee）就即刻上前迎接，實行兩位Charles嚟個合照先，咁啱兩人都姓李，只係英文串法不同。
不過李業廣噚日早到早走，5點半到場，同主人家影咗一陣相就隱身於人群，轉頭已經走咗。第二代主席夏佳理跟住就到，佢同李小加非常老友，同現任主席周松崗都一邊傾偈，一邊笑到見牙唔見眼。
雖然李小加不停話滬港通首年運作平穩，交到功課，但被人追問成交量差強人意時，好似顯得有點不耐煩，解釋「不是雨點太小，而是雷聲太大了」！
同場見到離開獅子銀行一段時間嘅馮婉眉（Anita），佢以港交所董事身份出席，佢神采飛揚，但唔肯講新動向。