愛爾蘭周一喺主場同波斯尼亞進行今屆歐國外附加賽次回合，憑刑滿復出嘅前鋒約拿芬禾達斯上下半場各入一球而贏2:0，兩回合合計贏3:1晉級，得以同英倫三島三支球隊英格蘭、威爾斯同埋北愛爾蘭，一齊參加明年夏天喺法國舉行嘅決賽周，兼且繼2012年後連續第二次殺入決賽周。
愛爾蘭嘅北愛籍領隊奧尼爾賽後大讚球員，仲話以佢哋為榮，同時亦認為當日決定搵堅尼嚟做副手係非常明智嘅決定。講開堅尼，喺球隊出線之後，負責球員衫褲鞋襪嘅波衫經理列蒙諗住將件印有「Bring on France 2016」嘅Tee畀呢位前曼聯隊長，點知俾對方一手推開，不過亦無損佢嘅心情，之後以一身超人造形同班球員喺更衣室慶祝。另外，賽前發生一件小風波，當雙方球員同球迷為巴黎恐襲死者默哀一分鐘時，有波斯尼亞球迷喺度叫囂，於是現場愛爾蘭球迷即刻噓佢哋，隨後更加鼓掌，以示尊重死者。
