成日聽到好多老闆遇到好廚師，就索性將廚師「私有化」，等自己隨時可以品嚐到佳餚，估唔到連醫師都可以有呢種做法。
富昌金融老闆郭俊偉噚日同傳媒食晏，席間除咗講股票，郭老闆仲有提到佢好鍾意打高爾夫球，之前仲因為打波搞到腰痠背痛，幾經朋友介紹，佢就搵到中醫師孟銳睇症。
郭老闆發現孟醫師原來醫術相當高明，於是一年幾前，索性自己喺中環開間叫「富仁堂」嘅中醫館，搵孟醫師坐鎮。富仁堂𠵱家未算好多人知，孟醫師嘅客仔主要就係富昌200幾名經紀同埋佢哋班客戶，然後再靠介紹傳開去。
據富昌員工講，每逢轉天氣、流感季節，郭老闆都會搵孟醫師執啲保健湯料，搵人煲好、包好放喺公司雪櫃，等員工自己翻熱嚟飲，聽落都幾溫馨。